--- 千字文 慎入 ---
不知不覺已經生左快九個月了！！
轉眼間感覺時間過得好快
挺住大肚子仲好似係前幾日嘅事
每次係街上見到孕媽媽都不禁回想大肚時光
與寶寶二合為一的感覺真好
但現在還未有心理準備迎接二胎啦(羞)
關於生產的感動 一定要好好記錄下來
我怕日子一天一天過 我會完全忘記曬（笑）
(生完真係會記憶力變差！真架！)
---- 預產期 2016.11.3 ----
一直都驚平日會見紅或穿水
因為擔心滕爸返左工 如果穿水點算呢？
一個人能夠拎住走佬袋去醫院嗎？定係等滕爸返黎先出發？
但原來不用擔心太多 寶寶會自己挑時間出來的啊
果然寶寶挑了星期日的晚上出來（乖）
---- 10月22日 - 零晨一時 ----
就似平日一樣十二點多已訓覺 一點多要起床尿尿
（懷孕後期一晚走幾次廁所）
尿尿後返床上準備繼續訓覺
約過左十分鐘左右 感覺又想尿尿了
落床走左幾步都無 感覺到下身有水流出來（驚）
量唔多 但都足夠令底底濕透了
當時手足無措 即衝入廁所
腦中不停出現 咁係未叫穿水？點算好？
我即時用超長姨媽巾頂住先
再返房間叫醒滕爸
再通知我媽咪穿水了
媽咪叫我準備東西去醫院
(穿水是不能沖涼的 因為怕胎兒受感染)
所以我只係換左衫便準備出發
記得換衫期間 整雙腳都震下震下
（心情既緊張又害怕吧）
十個月走來不容易 心中希望快點卸貨
但又害怕面對傳說中的十級痛楚（矛盾）
出門坐的士到瑪嘉烈醫院
整程路途中滕爸拖實我的手 叫我不用擔心
叫我放鬆心情 雖然整個人還是震震震的
到了瑪嘉烈醫院產房 禁鐘入內登記
聽到令我震撼的一個消息（驚）
護士問我有沒有收到電話中了B型鏈球菌？
我答沒有 她簡單答我
你中了 要打抗菌針
每四小時一次
明明之前說沒收到電話就沒中啊 點解到產房才告訴我（哭）
護士要求我換上醫院衫 再上床檢查是否已穿水
護士內診時真的挺難受
診症後也確實穿水了 被要求留院了
係產房期間不能攜帶手機 所有物品都要交比滕爸保管
滕爸不能長時間陪住我 交接好物品就要離開
只能在產房門外的椅子等待
我被安排了一間獨立房間等待生產
（不是我要求的 估計我到達時產房不多人 剛好獨立房有床位吧）
係床上 肚仔綁上檢查宮縮及寶寶心跳的東西
時間已經零晨兩點多了
護士間中會入房留意宮縮紀錄 還把燈較暗
叫我爭取時間休息
但我完全訓唔著呀 雖然痛感仲係0
間中聽到有其他媽媽傳來慘叫聲
又有護士的呼喝聲 - 你未生得架 你唔好用力啊
(心情真的很複雜啊)
眼光光的等待 又唔可以用手機
(之前仲下載定幾集RM諗住等生睇架嘛)
好不容易捱到6點多了
痛感仲係0 護士話測到我有宮縮
已經等左四小時 再觀察多兩小時
如果進度仲係0就要落催生水催生了
7點左右有姐姐派早餐 我怕無力生
所以有食 但只係一碗粥水 附贈飲管一支
8點左右 還是完全0 護士決定用催生水了
還有叫我考慮需要什麼止痛方法
有需要可以按鐘
我係仲未痛時已要求要笑氣及止痛針
(未雨綢繆是常識吧 笑)
之後開始我就踏上痛到癲左嘅十幾小時
中午十一點左右探病時間滕爸同奶奶都有黎
但當時我已經開始有規律地痛
係痛嘅時候聞笑氣 唔痛果時都可以傾下計
當時估計還未一度吧（驚）
探病時間只有一小時左右
滕爸又要離開產房
下一次探病時間約5:30
只係四個鐘多 我狀態已經完全大不同
我已經痛到不似人形了
5:30左右老公入黎同我講我媽咪黎緊
我已經痛到答唔到佢 我隱約講左我唔想我媽咪見到我咁
作為母親見到子女受苦 應該很心痛吧
果然媽咪黎到見到我 我見到佢偷偷落淚了
(打到依到自己都眼濕濕了)
當時媽咪見我咁痛 去問護士我開幾度
但護士只說沒咁快 不能經常內診
好易細菌感染啊
6:30左右探病時間又完了
佢地又要離開了
當時我已經覺得好痛好痛
不停吸笑氣 但完全沒止痛啊
8點左右吧 護士給我一個電話
叫我自己打比老公 通知老公進來陪產
但我已經沒力氣了 我問護士可以幫我打嗎?
護士只係話 你要自己打 如果你打唔到 你狀態仲適唔適合先生陪產?
算了 頂硬上 自己打 打左幾次 竟然無人聽電話
當下完全手足無措 眼淚不停流出來(哭)
護士話會廣播一下 睇下滕爸係唔係外面
五分鐘左右滕爸就進來
而痛感也越來越強了
有一刻好想用力推寶寶出來
我同護士講 我要生啦 好痛呀
護士準備了工具 在床拉出腳踏位
教我何時用力推 話比我試下
如果唔得就要等等再試
我用盡力了 但係唔得啊
所以要休息一下
過左半小時左右 有兩位護士入黎再教我陣痛時用力
但我真的很失敗啊 完全唔識用力
足足試了一個鐘 每次只見到寶寶頭髮又縮返入去
護士們開始緊張了 因為已經一個多小時
怕會影響寶寶吧 但我真的盡力了(哭)
滕爸一直都拖住我手 同我一齊用力 幫我打氣
再試左幾次 都係唔得 開始比護士鬧啦
(太太 你要用力啊 依家係你生唔係我生啊 比力啦)
之後有位女醫生黎左 話因為時間太長了
寶寶心跳開始下降跡象 醫生要求用引產
要吸寶寶出黎 比左份野我簽 亦要求滕爸離開
再繼續試 幾個護士用手幫我按肚推寶寶出黎
試左兩三次都係唔得
幾個護士係咁用力推 當下我已經唔覺得痛
只係好擔心寶寶咁耐都未出到黎會唔會有事
醫生最後講左句 試埋今次 唔得就開刀啦
最後依次 我又用力 四個護士又係我肚上面推 醫生係下面吸
終於出左黎啦(哭)
即時成個人鬆左一鬆 寶寶就比兒科醫生抱左去檢查
我就等聯針 轉頭兒科醫生話寶寶發燒同肺唔清
要轉去加護病房 望一望寶寶個手帶係我個名
就抱走左寶寶 而我就開始等聯針
聯針有打止痛 但都係好痛
不過當時覺得一切已經過去了 鬆口氣
聯針時我有同接生醫生講 對唔住啊
搞左咁耐 醫生答我最緊要大小平安 寶寶有喊到
之後護士比左杯水我 叫我休息一下等轉上產後病房
腦中一片空白 擔心寶寶發燒會唔會有事
不停諗係未因為自己唔夠力令到寶寶要去加護病房
到老公入左黎睇一睇我 我即刻忍唔住喊出黎
老公一句辛苦你了 我喊得更慘了
最後一點多我終於推去產後房了 佢地都鬆一口氣了
媽咪 奶奶 滕爸 都一直係外面等待
佢地知道我咁耐都未生到 都好擔心我
加上滕爸臨時被叫出去 氣氛真係好緊張
佢地好怕有突發事發生
所以一直都等待 等到見到我推上產後病房為止
多謝滕爸一直陪伴我 我明白陪產依件事視覺上確實係幾震撼
知你一直都留係產房門口等待 完全無訓覺 辛苦了 多謝你
也想跟你說聲抱歉 因為我的原因
令你無得見証寶寶出世一刻同剪臍帶
希望下一胎能夠補償你吧(笑)
深深感受--為母則強
由中獎一刻再經歷十個月考驗磨練 再面對生產痛楚
當見到寶寶平安健康出世
多痛 多苦 一切都值得了 !!!!
「滕滕 謝謝你來當我的寶寶」
往後人生請多多指教!!
(你的手是叫媽媽加油嗎? 笑)
不是聽說生BB不痛嗎？一個朋友幾個月前在瑪嘉烈生寶寶，她說一點都不疼的啊？聽你這麼說，我好害怕。😂😂
回覆刪除